【七宗罪 之七】 (全篇完) (建議順序由早前的六宗罪一看起)
「我真係唔可以再忍佢喇！佢咁帶領我地，一定只有死路一條！唔止佢，根本成個政府、成個黨都痴線，一定要清除左佢，國家先有轉機！」史提芬巴達，怒罵著相片，指著酒杯，在酒吧大叫著。
「咪咁大聲呀你…你都有公職，又係軍人黎... 點可以咁㗎...」愛斯特低聲地提醒史提芬巴達，「我明你點解咁講... 不過，唔好係到講，去辦公室先講啦...」
這時正值戰爭時間，兩軍互攻，史提芬巴達雖因戰功當上上校，但戰事亦令他受傷致殘；加上戰爭醜惡，領導兇殘，都使他對領導十分不滿。
「再由佢帶領，我地國家嘅人，真係全部都會死晒㗎... 而且佢當正自己係神咁，一唔鐘意就殺，不停咁殺啲佢唔鐘意嘅人... 愛斯特，唔可以再咁落去㗎喇... 不如... 由我地... 由我地去推翻佢？」史提芬巴達說。
愛斯特回應：「但係推翻佢，都係第二個上台，根本就一樣喎... 而且，咁係叛國罪...」
史提芬巴達吐出淡淡的煙圈：「係，推翻佢，第二個上，都可能一樣。咁不如我地自己搵人頂上去做國家領袖？起碼可以和談，起碼唔使由佢亂殺唔鐘意嘅人...」
史提芬巴達越說越激動：「無錯！做呢件事，我地係叛國，係叛徒；但如果不做，我地背叛嘅就係我地嘅良知！」
就是這樣，史提芬巴達與愛斯特，決定推翻國家領導，阻止戰事繼續打下去，亦阻止暴君胡亂殺人。不過，只有他們兩人，又怎能成事？於是，他們仔細找尋，共同有意願叛變的軍人。結果，只能找到十數人。
「我地太少人。點政變？」愛斯特說。
史提芬巴達沒有一點動搖：「一不做二不休，人咁少，根本推翻唔到，不如干脆，就咁刺殺左領袖佢？刺殺左佢，國家一定亂，仲點打仗？一定投降，到時可以議和呀… 好，一於刺殺領袖！」
愛特斯也同意：「好，一於刺殺領袖。我地要比全世界嘅人知，唔係所有子民，都支持呢個傲慢嘅暴君！一定要做。」
千想萬計，原來刺殺計劃，極不容易。領袖為人小心，加上相當傲慢，可以見他的人不多。惟一有機會的時間，是戰爭策略大會，但與會人少，大多是高級將領，要混進去並不容易。
不過，這才是千載難逢的機會。
因為會議內，全都是高級將領，領袖自然會放下戒心，刺殺變得很容易，而且可以順便一口氣除去數位主要將領，對往後議和、政變更有幫助。
終於，機會來了。作為上校的史提芬巴達，這天可以參與戰事簡報會。
「你一個，點殺咁多人？不如用公事包炸彈啦... 我一間比兩個炸彈你，你收埋佢係公事包，放係佢地前面。爆之前，你走咪得囉！」愛斯特提出這個大膽的建議。
就是這樣，史提芬巴達帶著裝有兩個炸藥的公事包，走進會議室。在開會之前，他進入洗手間，準備用鉗子，剪斷電線開始計時。
「X！點剪呀！明知我之前打仗受傷，得返3隻手指，仲預備呢啲鉗，點發力呢，X！」用了很長時間，史提芬都不能成功。啪，終於剪斷一條，成功開動第一個計時。
正要啟動第二個炸彈，門外突然有人拍門：「你做乜咁耐？係到搞緊乜！快啲出黎！」原來，有一位衛兵見史提芬巴達進去太久，心生懷疑，拍門問他發生什麼事。
史提芬巴達不理了，放棄啟動第二個，決定只使用一個炸彈，便開門出去。「無咩，放心，傷殘人士，用3隻手指，小便當然耐啲啦。」說罷，便直接走進會議室，漠視門外的衛兵。
史提芬巴達走上前，與領袖敬禮，並借故在領袖身邊，放下那個裝上炸彈的公事包，扮作忘記拿走，便回到自己預設的位置上。
幾分鐘後，史提芬巴達藉口接電話，離開會議室。一出會議室，便直奔向車子，開車離去。
才走了20米，便聽到「嘭」的一聲巨響，全個會議室都是火光濃煙。史提芬巴達開心得很：「掂！一次過炸死你班人渣！一個不留！」
車子逃到機場。
史提芬巴達正想告訴世人，「領袖已死，無需再戰」的時候，卻傳來廣播，是領袖的聲音：
「史提芬巴達，你唔係以為，炸彈會炸得死我呀嘛？神係可以比你呢啲低能凡人炸死㗎咩？而家我唔死，你嘅同謀、朋友、親人，全部都要落地獄啦！我話你知，我保證，一個不留。」
廣播還未重播第二次，史提芬巴達已經被捕。第二天，他的朋友、同謀、家人，全部一同被無情地槍決。
_______________________________
科學家約瑟夫，揚開枱上的白布，指著布內一條黑貓屍體，對著剛復活的Ace說：「我地同人打緊仗，你知啦？對手用左好多方法，諗住去打贏呢場仗，包括去研究神秘力量。例如：控制蝙蝠、麻雀，等佢地帶住啲小炸彈去炸軍艦；又例如，用原力做個小光波炸彈出黎，威力大到可以毁滅一個城市。哈，我以為漫畫笑下就算，咁都研究？真係浪費時間。我地軍方就好唔一樣，實事求事。你睇？」
科學家接著，拿出一幅照片，道：「人地研究天方夜談，我地研究新派科技。早兩年，我軍有支步兵隊，入左森林，發現一個部落，入面有好多我地解釋唔到嘅能力。例如：有個可以反映人內心恐懼嘅符籙、有可能吸收人青春嘅磁石、仲有種對我軍好有用嘅技術... 就係將貓嘅9條命，轉去人到，令到移植者有9條命。而你，就係成功實驗品。」
科學家約瑟夫，終於完成這項技術。「你知唔知，我殺左幾多人去做研究？為左呢個實驗，國家領袖比左幾多人我去殺，再去試復活？」他指著Ace說：「而家有你呢個成品，我就可以交待。你同我去見國家領袖，而家！」
得到國家領袖接見，科學家約瑟夫隨即展示復活成果。領袖很滿意，再叫科學家進行研究。
領袖指著一份名單，拋在地上，「我比一萬人你，任你殺，拎去做研究啦！反正，呢啲人污穢不堪，好令人厭惡，唔死都無用。你繼續研究復活術，下星期再匯報。」
一星期過去，科學家約瑟夫殺了420人。不過，由於根本沒有貓，所以被殺者當中，沒有一個可以進行任何移植手術，當然沒有人會復活。
再次進行匯報之前，科學家終於找到一隻黑貓。科學家沒有用來作復活研究，反而把貓帶來見領袖。
「我聽講你殺左420人，無復活一個。well done，你唔殺啲，佢地咁多人又咁污穢，會影衰晒個地球。哈哈哈！你拎貓黎做咩？」領袖一看到科學家便說。
科學家明白抬舉之道：「領袖，果啲低下乞兒，死幾多，無所謂。你就唔同，偉大得多。所以，只有你，先配合得上呢個復活嘅技術，因此，我帶呢隻貓黎...」
領袖始料不及，心中又覺得有道理：「可以復活係好，但係有無風險㗎...」
科學家連翻遊說，最終領袖完成貓腦下垂體移植手術，並得到復活的能力。
對此，領袖很高興：「做得好！哈哈，如果所有我地嘅民族、人民都有呢個技能，打仗點會輸！！哈哈！！不過... 都係唔好。......從今日起，你唔準再同任何人做呢個手術。呢個世界，就只有我同你之前嘅果個實驗品，可以復活，有無問題？如果比我知，你同人講呢件事，又或者你再做呢個手術，我一定殺左你。你返出去，再為我地國家、民族，去研究新技術！我再比多10萬人你做實驗，希望你有成果。」
_______________________________
就在史提芬巴達離開的一瞬間，會議室爆炸，炸彈就正正在領袖腳邊爆開。幾乎所有人，也都炸死炸傷，領袖站得最近炸彈，當然無法幸免。
不過，沒有人想到，十多分鐘，領袖已經爬了起來。
「領袖，你無事？領袖果然超然於人，係神，係天命，炸彈爆炸都避得過！」坐得遠遠的受傷將士，紛紛走上前來慰問。不過領袖好像沒有太大反應，只是坐著休息，過了良久，才慢慢的說：「你地咁靜，做咩唔出聲？」
原來，爆炸影響了耳膜。領袖雖然可以復活，但聽力卻不能復原，從那天起，他也失去70%聽力。
定下神，領袖走出門外，命令衛兵找來無線電作廣播。心水清澈的他，知道史提芬巴達一定有後著，亦怕戰爭對手會承機進攻，所以二話不說先作廣播，告訴全世界，自己沒有死去，穩住陣腳。
同日，他命人拘捕史提芬巴達一干人等，翌日槍決。
當然，機不可失，領袖順便也把一些功高蓋主的將軍、將士，一併列作刺殺關聯同謀，一同槍決掉，以保住自己地位。
「處理內部，先有力打出面嘅仗嘛，有咩唔啱？」
________________________________
刺殺後的一年，戰況急轉直下。領袖的一方，已經變到全無勝算。
他知道，是時候，要思考往後的道路。
「場仗，再打唔到幾耐......我應該點呢？如果戰敗，敵人捉到我，我亂殺咁多人，一定會槍決我。跟住...... 好快發現我唔會死...然後，不停折磨我... 我會直到永遠咁受折磨？... 而家我又唔想有復活嘅能力喇......」
領袖靈光一閃：「咪住先...我既然唔會死，咁我係所有人面前自殺，全世界以為我死左，我咪可以走甩，無人知囉？！」
領袖向太太遞上一杯清水，太太欣然喝下，只是她不知道，水中混和了氰化物，三分鐘不到，便已經離開世界。
領袖看著太太的屍體說：「我一家人，死都死得咁令人驕傲嘅，哈哈！」隨後拿出手槍，對自己，開了一槍。
數小時後，領袖自殺的新聞，震撼全球。雖然很多醫生都確認領袖心臟停頓，但從來沒有人清楚，領袖的屍首埋葬在哪裡。
________________________________
來到阿根廷生活，都已經60多年了。
開了家小押店，靠著以往的財產，生活總過得不錯。
當年對手的研究，「用原力造出小光波炸彈，希望威力可以毁滅一個城市」，雖然很漫畫，很可笑，但又怎會想像到，戰爭對手的科學家，竟然最終，真的能夠做出這種小光波炸彈？而且還投下兩個小光波炸彈，一下子就毁滅了廣島、長崎？
幸好我自殺在先，否則如果要繼續戰爭下去，我方也都必敗無疑。
不過，世人就是很奇怪。
不少人說我主張優生學，邪惡；哪現在你們不也是用基因工程，去進行更過份的優生系統？
你說我殺害、歧視其他民族，你不也歧視、殺害黑人、異色族群嗎？
說我屠殺太多人？你小光波炸彈，不是殺更多，傷害影響更多人嗎？
不過，指控我過去做什麼，也都沒有所謂了。
有什麼比冷眼看著世人的愚昧，更能消磨時間呢？
當然，我也不知道，自己還能夠生存至今。
所以說，凡人啊！你們又耐得我怎樣？
應該，元首我，仍有6次復活的機會啊…
【七宗罪 之傲慢】 (七宗罪 全篇完)
Search